Jacht unn Zucht weesche dere Pizza
von Joshua Rühl
In Flerschem, drunne omm Moo, duts a Werrtscafft gewwe, wo merr e funds Pizza esse konn. Grad im Summer owends isses besonners schee, weil die Lischder oo sinn unn die Pizza uff de Strooß innerem Ofe gebacke werrd.
![](https://hans-jakob-gall.de/wp-content/uploads/2021/09/20210911_173833-800x450.jpg)
Heit sitze doo zwaa Weibsleit, die enn gude Wickerer Woi drinke, dezu enn Zwiwwelkuche esse unn doodebei babbele.
![](https://hans-jakob-gall.de/wp-content/uploads/2021/09/20210911_173848-800x450.jpg)
Omm Newedisch hockt de Schorsch unn säufd oon Schobbe nooch emm onnere. Er hott sisch gleisch ne gons Kissd hiestelle losse, demett dess Froleinsche nitt alls laafe muss.
![](https://hans-jakob-gall.de/wp-content/uploads/2021/09/20210911_173856-800x450.jpg)
Donn kimmds wies kumme muss – er fälld mettsomd emm Hogger um unn schläschd de Läng nooch hieh. De Pizzabäcker kriehd enn mords Schreck.
![](https://hans-jakob-gall.de/wp-content/uploads/2021/09/20210911_173953-800x450.jpg)
De Schorsch hibbd uff, siehd de Oofe brenne unn blerrd „Feier!!“.
![](https://hans-jakob-gall.de/wp-content/uploads/2021/09/20210911_174052-800x450.jpg)
Er rennd beim Door enaus, hold soin Schmardfoon aus de Dasch unn rufd bei de Feierwehr oo. „Bei dere Pizzeria omm Moo duts brenne!“ kreischd er ins Delefon.
![](https://hans-jakob-gall.de/wp-content/uploads/2021/09/20210911_174259-800x450.jpg)
Die Feierwehrleit mache sich gleisch uff die Sogge unn rudsche die Stong erunner.
![](https://hans-jakob-gall.de/wp-content/uploads/2021/09/20210911_174528-800x450.jpg)
Ausm Door kimmd schunn de Löschwaache gefahrn unn die onnern Feierwehrleit renne noch hieh.
![](https://hans-jakob-gall.de/wp-content/uploads/2021/09/20210911_174700-800x450.jpg)
Alswie se all droi hogge, fährd de Löschwaache mit mords Karacho bei die Pizzeria.
![](https://hans-jakob-gall.de/wp-content/uploads/2021/09/20210911_174814-800x450.jpg)
Hinnenooch kimmd die Bollizei in ihrm neie Rennwaache.
![](https://hans-jakob-gall.de/wp-content/uploads/2021/09/20210911_175248-800x450.jpg)
Wie se bei dere Pizzeria ookumme, hibbd ooner vunn de Feierwehrleit außem Waache unn sischerd die Uugliggsstell.
![](https://hans-jakob-gall.de/wp-content/uploads/2021/09/20210911_175446-800x450.jpg)
Die onnern Feierwehrleit fahrn de Arm vumm Löschwaache aus unn spridze die gonse fuffzeh Kubigg ausm Tonk inn de Oofe noi.
![](https://hans-jakob-gall.de/wp-content/uploads/2021/09/20210911_175537-800x450.jpg)
Die Weibleit vumm onnern Disch sinn verschreggd uffgehibbd unn blerre all dorschenonner.
![](https://hans-jakob-gall.de/wp-content/uploads/2021/09/20210911_175618-800x450.jpg)
Alswie die gons Sach erum iss, siehd de Feierwehrmonn, dasses nur de Pizzaoofe war unn die Pizza alleweil batschnass iss.
![](https://hans-jakob-gall.de/wp-content/uploads/2021/09/20210911_175817-800x450.jpg)
De Butze mächd enn Foto vunn dere Pizza unn de Pizzabäcker seet „Moin Gott!!“.
![](https://hans-jakob-gall.de/wp-content/uploads/2021/09/20210911_175904-800x450.jpg)
Die Butze schwätze donn ersdemol mettem Schorsch, warum der su enn Uffstond gemächd hott.
![](https://hans-jakob-gall.de/wp-content/uploads/2021/09/20210911_180020-800x450.jpg)
Alswie se merke, dess de Schorsch die Heef hott, lossesen in enn Röhrsche blase.
![](https://hans-jakob-gall.de/wp-content/uploads/2021/09/20210911_180133-800x450.jpg)
Wie se dess Röhrsche donn innere Maschin unnersuche losse, iss gons klar, dess de Schorsch haggedicht iss.
![](https://hans-jakob-gall.de/wp-content/uploads/2021/09/20210911_180227-800x450.jpg)
Dess Froleinsche verzähld donn aach noch emol, was de Schorsch iwwer de Owend all gesoffe hott.
![](https://hans-jakob-gall.de/wp-content/uploads/2021/09/20210911_180404-800x450.jpg)
Dessdeweesche muss de Schorsch Hondschelle ookriehn unn in de Bollizeiwaache oisteihe.
![](https://hans-jakob-gall.de/wp-content/uploads/2021/09/20210911_180627-800x450.jpg)
De Bollizeiwaache fährd donn hoom uff die Bollizeiwach unn de Schorsch kimmd ins Kittsche.
![](https://hans-jakob-gall.de/wp-content/uploads/2021/09/20210911_180727-800x450.jpg)
Also horsch zu Schorsch – wennde dess nächsde mol su enn Dorschd host, donn sauf Wasser ausm Moo!
![](https://hans-jakob-gall.de/wp-content/uploads/2021/09/20210911_181210-800x450.jpg)